អភិបាលស្រុកតាំងគោក បានជំរុញអាជ្ញាធរមូលដ្ឋាន បង្កើនការរ ក្សាសន្តិសុខ សណ្តាប់ធ្នាប់ ក្នុងពិធីបុណ្យភ្ជុំបិណ្ឌ និង បង្រ្កាបល្បែងស៊ីសងខុសច្បាប់គ្រប់ប្រភេទ
(កំពង់ធំ)៖ លោក ហាក់ ម៉ុងហួត អភិបាលនៃគណៈអភិបាលស្រុកតាំងគោក និងជាប្រធានគណ:បញ្ជាការឯកភាពរដ្ឋបាលស្រុក បានលើកទឹកចិត្ត និងជំរុញដល់កងកម្លាំងទាំងបី-អាជ្ញាធរឃុំ ត្រូវបង្កើនការខិតខំយកចិត្តទុកដាក់ លើការ រក្សាសន្តិសុខ សណ្តាប់ធ្នាប់ក្នុងពិធីបុណ្យភ្ជុំបិណ្ឌ និង ត្រូវអនុវត្តឱ្យបានម៉ឺងម៉ាត់បំផុត ក្នុងការបង្រ្កាបឱ្យបាននូវល្បែងស៊ីសងខុសច្បាប់គ្រប់ប្រភេទ ក្នុងមូលដ្ឋានរបស់ខ្លួន ។
ការលើកឡើងនេះបានធ្វើឡើងនៅព្រឹកថ្ងៃទី ០២ ខែតុលា ឆ្នាំ២០២៣ ក្នុងកិច្ចប្រជុំគណៈបញ្ជាការឯកភាព ដើម្បីត្រៀមរៀបចំ សន្តិសុខ សណ្តាប់ធ្នាប់ក្នុងពិធីបុណ្យភ្ជុំបិណ្ឌ និង អនុវត្តបទបញ្ជារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ។ ត្រូវសំអាតអនាម័យបរិស្ថាន តុបតែងលម្អឱ្យបានសមរម្យ អាជ្ញាធរត្រូវបន្តពង្រឹងការអនុវត្តគោលនយោបាយ ភូមិ-ឃុំ មានសុវត្ថិភាពឱ្យបានល្អប្រសើរ ។
លោកអភិបាលស្រុក ក៌បានថ្លែងអំណរគុណដល់កងកម្លាំងទាំងបី កន្លងមកប្រឹងប្រែងថែរក្សាសន្តិសុខសណ្តាប់ធ្នាប់ ទប់ស្កាត់បាននូវការលួចឆក់ក្នុងមូលដ្ឋានបានល្អ បង្រ្កាបការជួញដូរគ្រឿងញៀន ជួយសម្រួលចរាចរណ៍តាមដងផ្លូវមិនឱ្យមានការកក់ស្ទះ ។
បន្ថែមពីនេះលោក ហាក់ ម៉ុងហួត ក៏បានជំរុញ និងលើទឹកចិត្តបន្ថែមទៀត ដល់អាជ្ញាធរ កងកម្លាំងសមត្ថកិច្ចគ្រប់លំដាប់ថ្នាក់ទាំងអស់ ត្រូវបង្កើនការយកចិត្តទុកដាក់ ក្នុងការ ការពារ សុវត្ថិភាពដល់ពុទ្ធបរិស័ទនៅតាមវត្តនីមួយៗ ព្រោះរដូវបុណ្យភ្ជុំនេះសំបូរពុទ្ធបរិស័ទអញ្ជើញមកវត្តយ៉ាងច្រើនកុះករ ប្រសិនពួកគាត់មានបញ្ហាប្រឈមអ្វីមួយ ក្រុមការងារថ្នាក់ស្រុក និង រកដំណោះស្រាយជូនដល់ពួកគាត់ឱ្យបានទាន់ពេលវេលា ។
ជាចុងក្រោយលោក អភិបាល ក៏បានណែនាំលោកមេឃុំត្រូវបែងចែកវេន របស់ក្រុមប្រឹក្សាឃុំ ប្រចាំការនៅវត្តតាមវេននីមួយៗរបស់ខ្លួន ដើម្បីក្តាប់បាននូវសភាពការសន្តិសុខសណ្តាប់ធ្នាប់ក្នុងពិធីបុណ្យភ្ជុំបិណ្ឌ ដើម្បីសុខសុវត្ថិភាពរបស់ប្រជាពលរដ្ឋក្នុងមូលដ្ឋានរបស់ខ្លួន ៕
(NCTV)
