ឯកឧត្តម ព្រឹម រដ្ឋា ដឹកនាំកិច្ចប្រជុំត្រៀមកម្មវិធីបុណ្យអុំទូកនៅខេត្តកំពង់ធំ ដែលប្រព្រឹត្តទៅនៅថ្ងៃទី២៨-២៩ ខែតុលា ឆ្នាំ២០២៣ ខាងមុខនេះ
(កំពង់ធំ)÷ នៅរសៀលថ្ងៃទី១៩ ខែតុលា ឆ្នាំ២០២៣ឯកឧត្ដម ព្រឹម រដ្ឋា អភិបាលរងខេត្ត និងជាប្រធានអនុគណ:កម្មការខ្លឹមសារ បានដឹកនាំប្រជុំជាមួយប្រធាន អនុប្រធាន និងសមាជិកអនុគណៈកម្មការខ្លឹមសារ ពិធីការ និង ព័ត៌មានទាំងអស់ ដើម្បីត្រៀមរៀបចំកម្មវិធីបុណ្យអុំទូកនៅតាមដងស្ទឹងសែន ខេត្តកំពង់ធំ ដែលជាពិធីបុណ្យនេះធ្វើឡើងជារៀងរាល់ឆ្នាំ ក្នុងការលើកទឹកចិត្តដល់ក្រុមកីឡាករ និង បងប្អូនប្រជាពលរដ្ឋ។
ឆ្លៀតក្នុងឱកាសនេះ ឯកឧត្តម អភិបាលរងខេត្តបានលើកឡើងថា ឆ្នាំនេះព្រះរាជពិធីបុណ្យអុំទូក អកអំបុល បណ្ដែតប្រទីប និង សំពះព្រះខែ មានរយៈពេល៣ថ្ងៃ ដែលប្រព្រឹត្តិទៅ នៅថ្ងៃ ១៤-១៥កើត និង ថ្ងៃ១រោច ខែកត្តិក ត្រូវនឹងថ្ងៃទី ២៦-២៧-២៨ ខែវិច្ឆិកា ឆ្នាំ២០២៣ នៅតាមដងទន្លេសាប មុខព្រះបរមរាជវាំង រាជធានីភ្នំពេញ។
ជាមួយគ្នានេះដែរ ឯកឧត្តមអភិបាលរងខេត្ត បានបន្តទៀតថា រដ្ឋបាលខេត្តគ្រោងរៀបចំពិធីប្រណាំងទូកថ្នាក់ខេត្ត នៅថ្ងៃទី ១៤ -១៥កើត ខែអស្សុជ ត្រូវនឹងថ្ងៃទី ២៨-២៩ ខែតុលា ឆ្នាំ២០២៣ ខាងមុខនេះ ក្នុងគោលបំណងបង្កបរិយាកាសជូនបងប្អូនប្រជាពលរដ្ឋ បានកំសាន្តសប្បាយ និងសម្រាំងទូកដែលមានលក្ខណៈសម្បត្តិល្អ ត្រៀមចូលរួមប្រណាំងក្នុងព្រះរាជពិធីបុណ្យ អុំទូក បណ្តែតប្រទីប និង អកអំបុក សំពះព្រះខែ នៅរាជធានីភ្នំពេញ ។
ដើម្បីឱ្យពិធីប្រណាំងទូកនេះប្រព្រឹត្តទៅ ប្រកបដោយភាពអធិកអធម រីករាយនិងជោគជ័យ រដ្ឋបាលខេត្តមានកិត្តិយស សូមអំពាវនាវដល់ សប្បុរសជនទាំងអស់មេត្តាជួយ ឧបត្ថម្ភគាំទ្រទាំងសម្ភារៈ និង ថវិកា រួមចំណែកជាមួយរដ្ឋបាលខេត្ត សម្រាប់ ប្រើប្រាស់ក្នុងការផ្តល់រង្វាន់លើកទឹកចិត្ត និង ផ្គត់ផ្គង់ ដល់កីឡាករកីឡាការិនី និងសម្រាប់ដោះស្រាយការចំណាយ ផ្សេងៗក្នុងពិធីនេះ។ រដ្ឋបាលខេត្តកំពង់ធំមានក្តីសង្ឃឹមយ៉ាងកក់ក្ដៅទុកជាមុន ចំពោះសប្បុរសជនទាំងអស់ពិតជាចូលរួមជួយឧបត្ថម្ភ គាំទ្រ ប្រកបដោយ ស្មារតីសាមគ្គី ថែរក្សាវប្បធម៌ ប្រពៃណីដ៏ល្អផូរផង់របស់ជាតិយើងជាក់ជាពុំខាន ។
សូមបញ្ជាក់ថា ទូកដែលត្រូវប្រកួតសរុបចំនួន៥៥ទូក កម្លាំង ចំណុះពិត ១.៣៧៥នាក់ កម្លាំងបំរុង៣៤០នាក់ សរុបកីឡាករទាំងអស់ចំនួន ១.៧៧៥នាក់ ។ ក្នុងនោះទូកវែងមានចំនួន០៧ទូក ទូកខ្នាតអន្តរជាតិមានចំនួន ៣២ទូក ទូកផ្កាចារមានចំនួន ១៦ទូក និង ទូកកងរាជអាវុធហត្ថមានចំនួន ០១ទូក ។ ស្រុកបារាយណ៍ចំនួន ០៤ទូក ស្រុកសន្ទុកចំនួន ០១ទូក ស្រុកស្ទោងចំនួន ០២ទូក ស្រុកកំពង់ស្វាយ ០៩ទូក ស្រុកប្រាសាទបល្ល័ង្កចំនួន ០១ទូក ស្រុកប្រាសាទសំបូរចំនួន ១៤ទូក ស្រុកសណ្តាន់ចំនួន ០៦ទូក ក្រុងស្ទឹងសែនមានចំនួន ១៦ទូក និង មន្ទីរកសិកម្មខេត្តមានចំនួន ០១ទូក ៕ (NCTV)
