ពលរដ្ឋប្រទះឃើញសពអណ្ដែតទឹក ស្ទឹងសែន ត្រង់ចំណុចអូរដៀប ស្រុកកំពង់ស្វាយ
(កំពង់ធំ)៖ នៅព្រឹកថ្ងៃទី២០ ខែតុលា ២០២៣ នេះប្រជាពលរដ្ឋ បានប្រទះឃើញសព បុរសម្នាក់ហើមអណ្តែតទឹកស្ទឹងសែន ត្រង់ចំណុចអូរដៀប ភូមិអន្លង់ក្រសាំង ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ។ លោកវរសេនីយ៍ទោ កែ កញ្ចនា អធិការស្រុកកំពង់ស្វាយបានឱ្យដឹងថា សពបុរសនោះ ឈ្មោះ ស៊ុន ចាន់ថន (ហៅ ពៅ ) អាយុ៣៣ឆ្នាំ មុខរបរកសិករ រស់នៅ ភូមិប្រឡាយ ឃុំសំបូរ ស្រុកប្រាសាទសំបូរ ខេត្តកំពង់ធំ ។
លោកអធិការបានបន្តទៀតថា៖ បើតាមការបំភ្លឺពីឈ្មោះ លី ទិត្យ ភេទប្រុស ដែលត្រូវជាបងថ្លៃសព និង លោកមេភូមិប្រឡាយឈ្មោះ ជា អុល បានឱ្យដឹងថា សពនេះជាមនុស្សញៀនស្រា ពេលផឹកស្រវឹងម្តងៗតែងតែវង្វេងរត់ពាសវាល ពាសកាល ដោយស្រែកឡាំប៉ាថា មានគេដេញសម្លាប់ ហើយក៏ធ្លាប់រត់ចូលទឹក ជាច្រើនដងដែរតែត្រូវបានគេជួយទាន់ ។ ប្រភពដដែលបានបន្តថា កាលនៅថ្ងៃទី ១៦ ខែតុលា ឆ្នាំ២០២៣ ប្រពន្ធបានចេញទៅរកស៊ី ដោយទុកឱ្យប្តី ដែលជាជនរងគ្រោះខាងលើ នៅផ្ទះមើលកូន ជាមួយម្តាយចាស់ ។ ជាក់ស្តែង នៅថ្ងៃទី ១៨ ខែតុលា ឆ្នាំ២០២៣ បុរស់ជាប្តីនោះក៏បានផឹកស្រាស្រវឹង ហើយក៏បាត់ខ្លួនទៅ ដោយពុំដឹងថាទៅណាឡើយ ម្តាយក្មេក បង-ប្អូន ក៏បានតាមរក តែរកមិនឃើញ ។ លុះដល់ថ្ងៃទី ២០ ខែតុលា ឆ្នាំ២០២៣ ទើបប្រទះឃើញ ដោយគាត់បានស្លាប់ ហើម អណ្តែតបាត់ទៅហើយ ។
លោក កែ កញ្ចនា អធិការស្រុកកំពង់ស្វាយ ក្រោយពីទទួលដំណឹងនេះ កម្លាំងជំនាញ ប៉ុស្តិ៍រដ្ឋបាល លោកមេភូមិឃុំ និង ពេទ្យ បានធ្វើការពិនិត្យកន្លែងកើតហេតុ និង ធ្វើកោសល្យវិច័យសព ជាលទ្ធផលពុំមានពាក់ព័ន្ធនិង ករណីឃាតកម្មឡើយ ដោយអះអាងថាសព ពិត្យជាស្លាប់ដោយសារលង់ទឹក មូលហេតុ ស្រវឹងស្រា និងដោយមានជម្ងឺសសៃប្រសាទផង ក៏ដើរធ្លាក់ទឹកបណ្តាលឱ្យលង់ស្លាប់តែម្តង ៕
បច្ចុប្បន្នសពខាងលើ ត្រូវបានកម្លាំងនគរបាលស្រុកកំពង់ស្វាយ ប្រគល់ជួនសាច់ញាតិដើម្បីយកទៅធ្វើ បុណ្យតាមប្រពៃណី ៕ ដោយ= (NCTV)
