មន្ទីរប្រឆាំងគ្រឿងញៀន បង្ហាញមុខក្រុមឧក្រិដ្ឋជន រួមទាំងថ្នាំញៀនជាងមួយតោន ដែលបង្រ្កាបបាន កាលពីពេលថ្មីៗ នៅខេត្តព្រះសីហនុ !!!
(ភ្នំពេញ)៖ មន្ទីរប្រឆាំងគ្រឿងញៀន បានបង្ហាញមុខក្រុមឧក្រិដ្ឋជនចំនួន ០៥នាក់ ជាជនជាតិចិន និង ជនជាតិ ហ្វីលីពីន រួមទាំងគ្រឿងញៀនជាង ០១តោន កន្លះ នៅព្រឹកថ្ងៃទី ២៤ ខែមករា ឆ្នាំ២០២៤ នេះ ។
គួររំឭកថា កាលពីថ្ងៃទី២២ ខែមករា ថ្មីៗនេះ កម្លាំងជំនាញកការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តព្រះសីហនុ បានសហការ ជាមួយកម្លាំងជំនាញនៃមន្ទីរប្រឆាំងគ្រឿងញៀន ដឹកនាំដោយលោកឧត្តមសេនីយ៍ទោ សាន សុទ្ធី នាយករងមន្ទីរ និងលោកវរសេនីយ៍ឯក ឈូក គា នាយករងមន្ទីរ និង កម្លាំងនគរបាលព្រំដែនទឹក វរៈ ២៤០ ដឹកនាំដោយលោកវរសេនីយ៍ឯក អ៊ុន សម្ផស្ស ដោយមានការសម្របសម្រួលពីលោក ពេញ ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តព្រះសីហនុ បានចុះបង្រ្កាបករណីជួញដូរ និង ដឹកជញ្ជូនឆ្លងដែនដោយខុសច្បាប់នូវសារធាតុញៀន ចំនួន ០២គោលដៅ គោលដៅទី ០១ ស្ថិតនៅចំណុច មុខកំពង់ផែកំពេញ ស្រុកស្ទឹងហាវ ខេត្តព្រះសីហនុ និង គោលដៅទី ០២ ស្ថិតនៅចំណុច ក្រុម៣ ភូមិ០១ សង្កាត់០១ ក្រុងព្រះសីហនុ ខេត្តព្រះសីហនុ ។
ជាលទ្ធផល កម្លាំងជំនាញ បានឃាត់ខ្លួនបានជនសង្ស័យ ចំនួន ០៥នាក់ ថ្នាំញៀនជាង ០១ តោនកន្លះ និង សំភារៈមួយចំនួនមានដូចជា៖
១/ ម្សៅពណ៌សសង្ស័យជាសាធាតុញៀនចំនួន ៦៧ការ៉ុង ដែលមានទំងន់សរុប ១.៥៦៦គីឡូក្រាម (បឋម)
២/ ទឹកថ្នាំដបពណ៏ខ្មៅសង្ស័យជាសារធាតុញៀនចំនួន ០៩ដប ។
៣/ ទូកឈើ ចំនួន ០២គ្រឿង
៤/ អូប័រខូច ចំនួន ០២គ្រឿង
៥/ ម៉ូតូ ម៉ាកស៊ុយស៊ូគីលែត ពណ៌ស ពាក់ស្លាកលេខ ភ្នំពេញ 1FF-8045 ចំនួន ០១គ្រឿង
៦/ លិខិតឆ្លងដែនចំនួន ០២ក្បាល
៧/ ទូរសព្ទដៃចំនួន ០៥ គ្រឿង
ចំណែកជនល្មើសទាំង០៥នាក់នោះមានឈ្មោះដូចជា ៖
១/ ឈ្មោះ shi yuan ya ភេទប្រុស ជនជាតិចិន
២/ ឈ្មោះ Huang xiao yu ភេទប្រុស ជនជាតិចិន
៣/ ឈ្មោះ Li zhong xian ភេទប្រុស ជនជាតិ ចិនតៃវ៉ាន់
៤/ ឈ្មោះ Huang zhi hong ភេទប្រុស ជនជាតិ ចិនតៃវ៉ាន់
៥/ ឈ្មោះ Luo shun ភេទប្រុស ជនជាតិហ្វីលីពីន ។
ក្រោយពីកម្លាំងជំនាញបានបើកប្រតិបត្តិការបង្ក្រាប និង ឃាត់ខ្លួនក្រុមឧក្រិដ្ឋជនចំនួន ០៥នាក់នោះ រូម ទាំងថ្នាំញៀន ជាង ០១ តោន នៅខេត្តព្រះសីហនុ ។
កម្លាំងសមត្ថកិច្ចនៅតែបន្តស្រាវជ្រាវរកមេខ្លោង និង អ្នកដែលពាក់ព័ន្ធដើម្បីយកមកផន្តន្ទាទោសតាមច្បាប់អោយខានតែបាន ។
ក្រោយការបង្រ្កាប ការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តព្រះសីហនុ បានប្រគល់ជនល្មើស និង វត្ថុតាងទាំងអស់ អោយទៅមន្ទីរប្រឆាំងគ្រឿងញៀន ដេីម្បីបន្តនីតិវិធី ។ បន្ទាប់ពីបង្ហាញមុខក្រុមឧក្រិដ្ឋជនទាំង ០៥នាក់ រួច មន្ទីរប្រឆាំងគ្រឿងញៀន នៃអគ្គស្នងការនគរបាលជាតិ បានបញ្ជូនពួកគេ និង វត្ថុតាងទាំងអស់ ទៅសាលាដំបូងរាជធានី ភ្នំពេញ ដើម្បីចាត់ការតាមនិតិវិធីច្បាប់ ៕
ដោយ៖ ( NCTV)