គ្រួសារសពអតីតយុទ្ធជន ពិការ នៅស្រុកស្ទោង ខេត្ដកំពង់ធំ បានទទូលអំណោយស្បៀងអាហារ និង ថវិកាបេឡា មរណសង្គ្រោះ របស់សម្តេចមហាបវរធិបតី ហ៊ុន ម៉ាណែត និង លោកជំទាវ
(កំពង់ធំ)÷ នៅរសៀលថ្ងៃទី០៩ ខែតុលា ឆ្នាំ២០២៣ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ រួមជាមួយថ្នាក់ដឹកនាំ នៃគណៈកម្មាធិការសមាគមអតីតយុទ្ធជន ស្រុកស្ទោង បាននាំយកថវិកាបេឡាមរណសង្គ្រោះ ចំនួន ០៤លានរៀល និង អំណោយស្បៀងអាហាររបស់សម្តេចមហាបវរធិបតី ហ៊ុន ម៉ាណែត និង លោកជំទាវ ពេជ ចន្ទមុន្នី ទៅប្រគល់ជូនក្រុមគ្រួសារសពអតីតយុទ្ធជនពិការ នៅភូមិគោករវៀង ឃុំប្រឡាយ ស្រុកស្ទោង ខេត្តកំពង់ធំ ។
លោកវរសេនីយ៍ទោ កែ ម៉ៃ អនុប្រធានក្រុមលេខាធិការដ្ឋានសមាគមអតីតយុទ្ធជនកម្ពុជា ខេត្តកំពង់ធំ បានបញ្ជាក់ថា លោកពលបាលឯក ម៉ាន់ ធី អាយុ៥៨ឆ្នាំ ចូលបម្រើកងទ័ពក្នុងឆ្នាំ ១៩៩១ នៅអង្គភាពកងពលធំលេខ៥ ។ លោកបានត្រូវរបួសពិការ ពេលដែលប្រយុទ្ធជាមួយខ្មាំងនៅ សមរភូមិចារកន្ទួត ស្រុកជាំក្សាន្ត ខេត្តព្រះវិហារ ក្នុងទសវត្សរ៍ទី៩០ ។ លោកបានទទួលមរណភាព ដោយរោគាពាធ នៅថ្ងៃទី ៨ ខែតុលា. ឆ្នាំ២០២៣ ម្សិលមិញនេះ ។
ឧត្តមសេនីយ៍ទោ សោម ស៊ុន បានថ្លែងនូវការ សោកស្ដាយចំពោះការបាត់បង់ជីវិត លោកពលបាលឯក ម៉ាន់ ធី ជាអតីតយុទ្ធជនពិការ ដែលធ្លាប់មានគុណបំណាច់ចំពោះជាតិ មាតុភូមិ និង ប្រជាជន ហើយសូមបួងសួងដល់វិញ្ញាណក្ខន្ឋ លោក ម៉ាន់ ធី បានទៅកាន់សុគតិភព កុំបីឃ្លៀងឃ្លាតឡើយ ។ ឧត្តមសេនីយ៍ទោ ក៏បានបញ្ជាក់ថា៖ ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា នាពេលកន្លងមក និង បច្ចុប្បន្ន ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម ទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធាន និង ជាអគ្គលេខាធិការសមាគមអតីតយុទ្ធជនកម្ពុជា លោកបានបន្តការខិតខំប្រឹងប្រែងគ្រប់បែបយ៉ាង ដើម្បីដោះស្រាយនូវរាល់ការលំបាក របស់បង-ប្អូន អតីតយុទ្ធជនយើងមានដូចជា ការបែងចែកដីធ្លី ការសាងសង់ផ្ទះសម្បែងជូន បង-ប្អូន អតីតយុទ្ធជន ដែលមានជីវភាពលំបាកខ្វះខាតពិតប្រាកដ និងការផ្ដល់នូវប័ណ្ណបេឡាជាតិសន្តិសុខសង្គមជូនបង-ប្អូន អតីតយុទ្ធជន សម្រាប់ទៅព្យាបាលជំងឺនៅមន្ទីរពេទ្យរដ្ឋដោយឥតគិតថ្លៃ ។ ហើយនៅពេលដែលអតីតយុទ្ឋជនយើងទទួលមរណភាពក្រុមគ្រួសារសពទទួលបានថវិកាបេឡាមរណសង្គ្រោះចំនួន ០៤លានរៀល សម្រាប់ធ្វើបុណ្យសព គឺដោយការផ្ដួចផ្ដើមឡើង របស់សម្ដេចនាយករដ្ឋមន្ត្រី នៃព្រះរាជាណាចក្រកម្ពុជានៃយើង ដើម្បីសម្រួលដល់ការធ្វើបុណ្យសពឲ្យបានសមរម្យនិង អោយបានទាន់ពេលវេលាមិនឱ្យលើសពី ០៧ថ្ងៃឡើយ ។
នៅក្នុងឱកាសនេះ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ឋជនកម្ពុជា ខេត្តកំពង់ធំ បាននាំយកនូវអំណោយរបស់សម្តេចមហាបវរធិបតី ហ៊ុន ម៉ាណែត និង លោកជំទាវ ពេជ ចន្ទមុន្នី ចូលរួមក្នុងពិធីបុណ្យសពនេះបន្ថែមទៀតរួមមាន៖ អង្ករចំនួន ៥០ គីឡូក្រាម មីជាតិចំនួន ០២កេស ត្រីខកំប៉ុង ចំនួន០២យួរ ដែលត្រូវបានប្រគល់ ជូនគ្រួសារសពអតីតយុទ្ធជននៅថ្ងៃនេះផងដែរ ។
ក្រុមគ្រួសារសពរបស់លោក ពលបាលឯក ម៉ាន់ ធី បានគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរអធិបតី ហ៊ុន ម៉ាណែត និង លោកជំទាវ ព្រមទាំងគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ ដែលបានឧបត្ថម្ភប្រាក់បេឡាមរណៈសង្គ្រោះ និង អំណោយគ្រឿងឧបភោគបរិភោគបានទាន់ពេលវេលាក្នុងពិធីបុណ្យសព និង សូមគោរពជូនពរសម្ដេច អគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង លោកជំទាវ ឯកឧត្តម លោក លោកស្រី ទាំងអស់សូមបានជួបប្រទះនូវពុទ្ធពរទាំង០៤ ប្រការកុំបីឃ្លៀងឃ្លាតឡើយ ៕
ដោយ = ( NCTV )