សពយុវតី ដែលខឹងជីដូន និង ម្ដាយមីងស្ដីបន្ទោស បន្តិច បន្តួច លោតទឹកសម្លាប់ខ្លួន ពីលើស្ពានថ្មរ ខេត្តកំពង់ធំ កាលពីព្រលប់ ថ្ងៃទី១ ខែតុលា នោះ ពេលនេះបានរកឃើញហើយ
(កំពង់ធំ)៖ សពយុវតី ដែលខឹងជីដូន និង ម្តាយមីង ស្តីបន្ទោស បន្តិច បន្ទូច រូចទៅលោតទឹកសម្លាប់ខ្លួននៅចំណុចស្ពានថ្មរ ខេត្តកំពង់ធំ កាលពីថ្ងៃទី១ ខែតុលា កន្លងមកនោះ ពេលនេះ សមត្ថកិច្ច រកឃើញហើយ ។
លោកវរសេនីយ៍ឯក គឹម សុខមករា អធិការនគរបាលក្រុងស្ទឹងសែន នាព្រឹកថ្ងៃទី ០៣ ខែតុលា ឆ្នាំ២០២៣
បានដឹកនាំកម្លាំងស្វែងរកប្រទះឃើញសពអណ្តែតទឹកនៅចំណុចភូមិពាមគ្រែង ឃុំក្តីដូង ស្រុកកំពង់ស្វាយ ខេត្តកំពង់ធំ នៅវេលាម៉ោង ៧:១០នាទី និង បានប្រគល់សព ជួនក្រុមគ្រួសារយកទៅធ្វើបុណ្យតាមប្រពៃណី។
គួរបញ្ជាក់ថា យុវតីម្នាក់ខឹងជីដូន និងម្ដាយមីងដែលនៅជាមួយស្ដីបន្ទោសបន្តិចបន្តួច គិតខ្លីបានសម្រេចចិត្តលោតទឹកសម្លាប់ខ្លួន ។ ហេតុការណ៍នេះកើតឡើងនៅម៉ោងប្រមាណ ១៩:២៥នាទី ថ្ងៃទី០១ ខែតុលា ឆ្នាំ ២០២៣ នៅចំណុចលើស្ពានថ្មកំពង់ធំ ស្ថិតក្នុងភូមិកំពង់ក្របៅ សង្កាត់កំពង់ក្របៅ ក្រុងស្ទឹងសែន ខេត្ត កំពង់ធំ។
យោងតាមប្រភពសមត្ថកិច្ចនៅពេលកើតហេតុបានឱ្យដឹងថា យុវតីដែលលោតទឹកសម្លាប់ខ្លួននោះមាន ឈ្មោះ ម៉ៅ សុភាព អាយុ១៥ឆ្នាំ ជាសិស្សរៀនថ្នាក់ទី៩ ជាក្មេងកំព្រាឪពុក មានម្ដាយឈ្មោះហាប់ សុផាន អាយុ ៥៦ឆ្នាំ រស់នៅភូមិក្តី សង្កាត់ព្រៃតៅហ៊ូ ក្រុងស្ទឹងសែន ខេត្តកំពង់ធំ ។ សពត្រូវប្រឡងឌីប្លូម នៅព្រឹកថ្ងៃទី០២ ខែតុលា ឆ្នាំ២០២៣ ។
ប្រភពដដែលឲ្យដឹងទៀតថា សព្វថ្ងៃយុវតីរងគ្រោះស្នាក់នៅជាមួយអ្នកជិតខាងឈ្មោះ ប៊ូ សុធារ៉ា ភេទស្រី អាយុ៥៦ឆ្នាំ មានមុខរបរជាមេផ្ទះ រស់នៅ ភូមិ / សង្កាត់ ជាមួយម្តាយជនរងគ្រោះខាងលើ ។ តាមការបញ្ជាក់របស់សមត្ថកិច្ចឲ្យដឹងបន្ថែមទៀតថា មូលហេតុ នាំអោយក្មេងស្រីនោះលោតទឹកសម្លាប់ខ្លួនគឺ ដោយសារខឹងជីដូន និង ម្ដាយមីងដែលនៅជាមួយ បានស្ដីបន្ទោសរឿងដើរលេង មើលទូរសព្ទ មិនធ្វើការងារផ្ទះ និងព្រឹកឡើងត្រូវប្រឡងឌីប្លូមផងនោះ ។ បច្ចុប្បន្ន សមត្ថកិច្ច បានប្រគល់សាកសពជួនក្រុមគ្រួសារយកទៅធ្វើបុណ្យតាមប្រពៃណី ៕
( NCTV )
